Степан Эрьзянь шкинемасо мокшонь-эрзянь раськетне вастневить сеедьстэ. Алкуксонь ломань лангс ванозь, скульпторось бажась теемс мокшэрзянь авань вейсэндявозь чачо. Исследовательтнень мелест коряс, «Эрзянь ава» скульптурань композициянть сон теизе Евфимия сазоронзо лангс ванозь.
Эрзянь авась невтезь аволь поэтизированнойстэ: виде чачонзо невтемга, скульпторось нолдась тевс художествань пек аламо сюпавчить. Раськень пряс путомказо тешксты геометриянь парцунонть. Рунгонзо-вановтонзо видеть, кедьякамозо кеме, теке марто авась лавшо, покордамодо апак кородо.
Артур Моро сёрмадыцясь ловсь те скульптуранть реализмань лувсо топавтозекс. Сонзэ коряс, те – апелиця од эрзявань мельс туиця портрет. Чамасонзо явовить пешксе турватне ды аламодо лисезь чамаловажатне. Моронь коряс, весе те «невти потмовиень кемечинзэ ды пси коронзо», конатнень онкстить прянь кирдемась ды кеме обуцясь. Теке марто откерьавась апак тее ёжомарямовтомокс. Эрзяванть човине кувака суронзо невтить мазычинзэ, салыть вановт, нолдазь черензэ тешкстыть эйсэнзэ весе авансенть.
Те аволь сюпав композициясонть Эрьзя ламо мель явсь башка тешкстнэнень. Монументальной «коцтонть» лангсо сон ёроковсто невтинзе сехте эрявикстнэнь: оршамопеленть лангсо викшневкстнэнь, кирьгакштнень, сюлгамосо чочазь палясивенть. Куншкасурсонзо неяви суркс, ансяк тейтересь мирденень апак лисе: теде корты вить лавтовганзо каязь черьпулозо. Мирденень лисезь аватне пурныльть черест керьминес ды кекшилизь пряс путоманть алов.
«Эрзянь ава» скульптурась теезь армировазь бетонсто, куш скульпторонть лемезэ кеместэ сюлмавсь кебрачо ды альгарробо чувтотнень марто. Сон важодсь мрамор мартояк, ансяк сизесь лисиця чачотнень тонадовиксчиденть. Эрьзя свал ульнесь коень каршо молицякс, секс арсесь изнямс казямо железобетононть, конань истя а вечксызь скульптортнэ. Нолдылизе тевс авань чачотнень невтемстэяк, ансяк шкань ютазь бетононь казямочист лоткась тензэ вечкевемеде.
Теке марто «Эрзянь авась» железобетонсояк неяви кемечисэнзэ аявовиксэкс. Шкиницясь эзь вечке кольнемат-нильтякалемат, секс раськень теманть топавтомо кундась апак налксе. Раськенсесь важодевкссэнзэ сельмес а кайсети, сон невтеви башка тешкстнэнь, пластиканть, вейсэнь ёжонть вельде. Скульпторось зярдояк эзь кепсе раськень мельтнень башка ломанень образдо верев.
«Эрзянь авась» явовты мель аволь ансяк историянь ды раськень ёнкстнэнь коряс. Васняяк, те авань чачо – ламо лия чачосто теезь ды теке марто киньгак ёнов а молиця. Натой казямо железобетонсо скульпторонтень невтевсть авань мазычись ды валдо талномась.
