Эрзятнень востокань группасна эряй Мордовиянь Ардатовскяй, Атяшевскяй, Большеберезниковскяй, Дубёнскяй, Кочкуровскяй, Чамзинскяй районца, синь мархтост шабра Ульяновскяй областеть районцон эса, стане жа Чувашиянь Алатырскяй ды Ибресинскяй районца. Тя модатне вельхтяфт сатома лопань сюлмаф вирьса, конат полафневихть панжада вастова. Востокса синь ограничендасыне естественнай межась — Сура лейсь.
Тоса костюмть важнай элементокс ташта пингста ульсь умборькс мазепсь «пулай». Тя регионца пулайсь ульсь башка пышнай формаса, няфтезе умбонеть аванень мазочинь стандарттнень коряс. И пулайсь, и аф оцю напускса щаф панарсь, и козяста мазф фартуксь оцюлгофтозь фигурать оцюшинц. Тяка пингть стирьсь аф няевсь массивнайкс ды алкянякс — сери пряс щамть ды сембе элементтнень вертикальнайста ащи декорань полосаснон инкса.
Костюмть пря элементокс ульсь панарсь. Сонь стасть кансть аф акшефтьф котфста. Панарть стамац, кода сембе финно-угрань народтнень, ульсь туникань кондяма. Сонь станоц ульсь кафта стаф котф панжемста, кафтонь пялес мяндьфста. Центрса шовть кувалмос кадондсть кафта керомат. Фкясь — домка, колмоугольнай — пряти, омбоцесь — подолса, эряви якамста. Виде ожатне аф клинфтома ульсть котфть кяльдеванц кондямот ды нолдавсть кенерьпакарьть алу аф лама. Синь алост стасть квадратнай ластовицат.
Панарть мезенди эрявомац коряс мазолафтозь сёрматфомаса. Сонь тиезь понань эсь штирьф суреса, конат краскафтольхть кустань краскаса, конатнень сявозь подмаренникть корьненц эзда, келуть пупорензон, лепеть кедензон ды эрь кодама тишеть эзда. Сёрматф узортнень пря тюссна ульсь якстерь-тюжя, сонь поладозь пиже ды тюжа вкрапленияса. Аф крхка пингть узортнень тиезь равжа эли сенем окантовкаса. Праздникань панартнень сёрматфомаснон мазолафтозь блёсткаса.
Панарть лангс мирденди лиснихне щасть панжада щам «руця». Сонь колоритсонза азорондсть якстерь ды равжа тюст. Сёрматфомада башка сонь мазолафтозь браной — узорса кодаф — полоскаса, позументса, пуговицаса. Руцять общай декоронц поладозь теине вертикальнай кумачень нашивкат, конат ащесть копорьса ды полава. Руцясь ульсь ритуальнай щам. Сонь щасть праздникова ды ванфтозь кулома меленъ костюмкс.
XX-це пингть ушетксста эрзятнень востокань группань костюмсна оцю полафтомат няйсь. Кеме пряс щамтнень вастс састь фабрикань пацят. Панартне тиевсть пяк седе скромнайкс декорснон коряс. Руцять стака сёрматфоманц вастс састь якстерь кумачень полоскат. Дубёнскяй, Атяшевскяй, Чамзинскяй районца од ломаттне ушедсть щамс рузонь «парочкат», конат ащесть кофтаста ды юбкаста, эли «сарапант» — валда фкатюсонь атласта платьят. Традиционнай костюмсь тяса малав ёмась 1950-це кизотненди.
