Мокшетнень северо-западнай группасна эряй инголень Пензенскяй губерниянь Краснослободскяй уездть ды Темниковскяй уездть территориянц лангса, коса шуди Мокша лейсь. Сонь бассейноц ди тиевсь мокшень плематнень коренной эрямань вастокс. Синь тевонь тиендсть модань видемаса, скотиннянь ванфтомаса, оцюрямаса, калонь кундамаса, бортничестваса. Велетне ащесть пяк лейть ды сонь притоконзон берёкнень эзга.
XII-це пингеста мокшетнень эрямань территорияснон лангс появандасть рузт Рязанскяй княжествать эзда. Рузонь эряйхне эрясть аф вирьса вастова, а мордвась, мекелангт, кельгсь эрямс вирьхнень эса. Рузтнень тя территориятнень лангс эрямаснон сязезе монголо-татаронь нашествиясь. Сонь результатоц ульсь мордовскяй модатнень шавомась.
Казанскяй ханствать прамода меле 1552-це кизоня рузтне таго ушедсть аремс тя территориятненди. XVI-це пингеста мордовскяй эряйхнень пялькссна савсь молемс шире, Темниковскяй уездть пределонзонды. Тянь мархта регионца историческяйста тиевсь мокшэрзянь велетнень шабрасна рузонь ды татаронь велетнень мархта.
Тя оцю мяльса токась мокшетнень национальнай костюмснон лангс. Сонь башка тиезе мазепнень ламоц, конатнень тиемс тевс нолдасть ярмакт ды эрь кодама жетонт — горошкат, мезсь ульсь тюркскяй народтненди характернай. Тяда башка, тоса аванень костюмть пяльксокс ульсть понкст ды жилеткат, конат совсть национальнай татаронь платьяти.
