Волгать керши берёконц лангса мокшэрзятнень эрямань регионсна сявонды оцю территория Камать пец эзда Уралть пандонзон ваксс молемс. Тя зонати совихть Ульяновскяй областеть Мелекесскяй, Ново-Малыклинскяй, Чердаклинскяй районца, Татарстанонь Лениногорскяй, Черемшанскяй, Чистопольскяй районца, Самарскяй областеть Исаклинскяй, Клявлинскяй, Кошкинскяй, Похвистневскяй, Челно-Вершинскяй, Шенталинскяй ды кона-кона лия районца, Оренбургскяй областеть Абдулинскяй, Бугурусланскяй, Бузулукскяй, Севернай районца, Башкортостанонь Аургазинскяй, Ермикеевскяй, Стерлитамакскяй районца.
Мокшэрзянь эриихне васендакс ушедсть тевс нолдамс Волгать керши берёконц. Васенце мокшэрзянь велетне, конат лиссть Заволжьяса XVII-це пингеста, ащесть Сок ды Оцю Черемшан лейхнень бассейнцон эса. Од вастса эрямань условиятне лама мезьса ульсть мокшэрзятнень шачема масторснон климатть кондямот, тянь инкса эриихнень пря тевснон лядсть модань видемась, животноводствась, вирень ды лейень промыслатне. Волгати малав эриесь нижегородскяй мордвась, Симбирскяй, Пензенскяй ды Саратовскяй губерниятнень эзда мокшэрзянь эриихнень группасна сюватсть Самарскяй модать потмос.
Заволжскяй регионть мокшэрзянь народнай костюмоц касесь башка, тянь инкса ванфневсь малав аф полафтф рартса XX-це пингть ушетксозонга. Но мордвась стане эли тяфта сотневсь рузонь эряйхнень мархта, мезсь токась платьять кой-кона деталензон лангс. Мъсялда, мирденди лиснихне кандсть рузонь кондяма пряс щамт, конат повойникть лацот ульсть — полотнянь шапкат, конат цебярьста сёлгондсть шяярьхнень. Тяда башка, костюмть фкя элементокс пингть йоткс тиевсь кедень котфомась — котат, конатнень кандсть акша понань чулкат мархта. Башка велень группатнень эса мокшэрзянь костюмсь цебярьста полафтовсь рузоньди, конац ульсь шабратненди типичнай — Тамбовскяй, Курскяй, Смоленскяй губерниятнень эзда эриихненди.
Оцю васта национальнай аванень костюмса налхксесь сёрматфомась (вышивкась). Щамть мазолафтозь бисерса, блёсткаса, сырнень суреса. Сёрматфомась тёждяста вельхтясь котфть. Мастерицатне тевс нолдасть аф фкакс техникат, конатнень эрь фкянц ульсь эсь лемоц, мъсялда: эрзянь тяштеня, пелькрёст, ёлкань лацо стамась, кичкор стёжкась, набор.
