Художник Сергей Добряков гижис Войвыв туялӧмлы, мортлӧн вӧр-вакӧд ӧтув олӧмлы сиӧм зэв тӧдчана уджъяс. Сылӧн джуджыд мӧвпъяса, абу яръюгыд рӧмъяса серпасъясын петкӧдлӧма вына да уджач йӧзӧс. Тшӧкыда сылӧн уджъясыс оз лӧсявны кутшӧмкӧ торъя жанрлы, найӧ декоративнӧй панно кодьӧсь. Художник туяліс Ас му туялан музейын этнография материал, та вӧсна сылӧн уджъясыс матынӧсь збыльвывса олӧм дорӧ.

Хрущев кадся оттепель дырйи художникъяс пӧвстысь унаӧн серпасавлісны уджалысь-вӧралысь мортӧс. Коми муын йӧзыс важысянь кыйсисны-вӧралісны, пӧль-пӧчӧн чӧжӧм сямыс вуджис кӧленаысь кӧленаӧ да эз вежсьыв ХХ нэмлӧн мӧд джынйӧдз.

1972 вося серпасын петкӧдлӧма коми вӧралысьлысь ӧтувъя образсӧ.

Вӧралысьыс сулалӧ лымъя, сук козъя вӧрын, кыйӧма уръясӧс – налӧн куыс ӧшалӧ кыйсьысьлӧн тасма вылын. Сыкӧд орччӧн медбур ёртыс да отсасьысьыс – самоедскӧй лайка.

Вӧралысьыс пасьталӧма визя лаз. Сытӧг вӧрӧ эз ветлывны. Лазсӧ вурлісны ас кыӧм нойысь, югыд да пемыд рӧмъяс вежлалӧмӧн. Лаз увтысын лӧсьӧдлісны кыйсян кӧлуй вылӧ зепъяс.

Быд вӧралысьлӧн вӧлі лызь да лямпа. Лызьсӧ вӧлі эжӧма кӧрлӧн кокчӧр кучикӧн, а лямпасӧ вӧчлісны козйысь либӧ пожӧмысь. Лямпаӧн ветлісны уль поводдя дырйи, медым ӧдйӧджык исковтны. Лямпаясыс вӧліны кык метра кузьтаӧсь. Найӧс кӧмавлісны лызь кӧртӧд отсӧгӧн.

Коми му кузя ме муна

Коми му кузя ме муна.

Гӧгӧр сулалö сьӧд вӧр.

Вӧрыс вывтi-вывтi уна,

Сыысь унаыс оз тӧр.

Аддза: сэнi шыльыд пожӧм

Вылӧ лэптӧ ассыысь юр.

Сылы ӧткодь тӧв кӧть гожӧм.

Сэтшӧм пуыс тайö бур.

Сэнi быттьӧ пӧрысь пӧчӧ

Дзормӧм кыпӧдчӧма коз.

Сiйӧ увъяс костын вӧчӧ

Вӧрса пӧтка шоныд поз.

Сэнi вашкӧдчӧны гора

Пипу чойкӧд еджыд кыдз,

Мыйкӧ сёрнитӧны нора,

Корнас шенасьӧны сiдз.

Сэнi суспу гӧгрӧс бока,

Сэнi пелысь, сэнi льӧм.

Танi бадьяс вӧсны кока

Вадор пӧлӧн уна эм...