Тайӧ XX нэм шӧрся – XXІ нэм заводитчӧмся профессиональнӧй искусствоын Коми мулӧн ӧтувтӧм художествоа образ. Выставкасӧ котыртӧма нёль залын, быдӧн на пиысь йитчӧма ӧти медшӧр темакӧд.
«Войвыв серпас» юкӧн сиӧма Войвывлӧн кӧдзыд, зумыш, зэв мича да кыпыд вӧр-валы. Сійӧс петкӧдлӧма сьӧлӧмӧ йиджан пейзажъяс отсӧгӧн, кӧні тыдалӧ помтӧм-дортӧм, чӧв-лӧнь, ас кежысь олысь вӧр-ва.
«Коми му туялӧм» экспозицияын петкӧдлӧма 1960 – 1980 воясся сӧветскӧй искусствоса геройясӧс: геологӧс, шахтёрӧс, стрӧитчысьӧс, рабочӧйӧс. Экспозиция дорӧ содтӧма документальнӧй кинохроникаысь кадръяс.
Кык блоксӧ йитӧ «1940 – 50-ӧд воясся искусство» юкӧн: тайӧ кадӧ ГУЛАГ лагеръясын пукалысьяс босьтчӧны промышленнӧя туявны Коми мулысь мупышкӧсса озырлунсӧ.
«Миф» юкӧнын войтырӧс тӧдмӧдӧны Коми йӧзлӧн легендаясысь ен туйӧ пуктан пемӧсъяслӧн, вӧрсалӧн да сакральнӧй пуяслӧн образъясӧн. Водзӧ религия да роч цивилизациялӧн асыв-войвылӧ локтӧм йылысь сёрниыс мунӧ «Эскӧм» юкӧнын.
Коми мулӧн вужвойтырлӧн, комияслӧн да рочьяслӧн оласноглы сиӧма «Оланног» юкӧн: сиктса пейзаж, сиктсаяслӧн портретъяс, войвыв керка пытшкӧс, гортса кӧлуйысь натюрмортъяс, гажъяс да ӧбрадъяс.
Экспонатсӧ пасйӧма AR стикерӧн, медым унджык тӧдмавны на йылысь.
