Голландскӧй школаса медыджыд анималист Паулюс Поттерлӧн тӧдса «Ферма» картинаысь копиясӧ 1866 воын вӧчис рочь художник Садовников. Эм мӧвп, мый тайӧ Федор Петрович Садовников (? –1875), Художествояс Академиялӧн вольнӧя пыралысь велӧдчысь, коді 1846 воын натурасьыс гижӧм портрет вӧсна босьтіс некласса художник ним. Копияыс ачыс — вылын художествоа донлуна торъя удж.
Паулюс Поттер (1625–1654) — живописец, серпасалысь, офортист. Голландскӧй школаса медыджыд анималист. Голландскӧй живописьын Поттер ӧтиӧн медводдзаясысь заводитіс серпасавны пемӧсъясӧс. Сійӧ ас вылӧ перйис нимдон, серпасалӧмӧн лӧнь сикт олӧм. Сылӧн картинаяс вылын — каръясӧс да котырлысь элитасӧ сёянӧн могмӧдысь прӧстӧй уджалысьяслӧн олӧм. Художникыс зэв збыльлуна серпасалӧ голландскӧй крестьянинлысь быд лунся олӧм, мичмӧдӧ сылысь удж лунъяс, любуйтчӧ пемӧсъясӧн да налӧн яй вынӧн, вуджӧдӧ налысь обича да тэчӧ быд пемӧслысь монументальнӧй образ. Поттер олӧма дженьыд олӧм, ставыс 28 во, но удитіс лӧсьӧдны уджъяс, кодъяс лоӧны XVII нэмса Европаса живописьын тӧдчана явлениеӧн.
Поттерлӧн «Ферма» (1649) картиналӧн история зэв интереснӧй. Картинасӧ Поттерлы заказывайтіс Голландскӧй Республикаса веськӧдлысьлӧн гӧтырыс, но озыр заказчицаыс картинасӧ чӧвтіс. Сэк картина дорын заводитчисны кузь приключениеяс да туйвыйӧдлӧмъяс. Сійӧ вӧлі Бельгияын, Нидерландыын да Германияын чукӧртӧмъясын. 1806 восянь 1814 воӧдз сійӧ вӧлі Жозефина Бонапартлӧн коллекцияын, а сылӧн кулӧм бӧрын муніс Россияӧ, Эрмитажӧ, кӧні видзсьӧ ӧнӧдз.
