Степан Эрьзя эсь творчествасонза мокшэрзятнень няфнезень сидеста. Скульпторсь тяряфнесь тиемс мокшэрзянь авань марстонь образ, и кепотьксокс тя тевса теенза арсесть афкуксонь ломаттне. Исследовательхнень мяльснон коряс, «Эрзянка» скульптурнай композициять сон тиезе кирдемок мяльса Евфимия сазоронц.

Эряви азомс, эрзявась няфтеви ёфси аф поэтизировандафста: мастерсь тись пирамида лаца стака бюст-монолит. Афкуксонь ломанень образонь тиемста Эрьзя нолдась тевс ёфси кржа художественнай средствада. Уликс геометричностть китькстазе пряс путомкась. Героинять строгай ронгоц, виде сельмованфоц и эсьлацонь кядень яфодемац — сяка пингть бта и отькорь, и ляпоня, пелиня. Тя яфодемать ули кода шарьхкодемс и пара тевонкса сюконямакс, и мялень ваномакс, и абондомакс-таколдомакс.

Мокшэрзянь писательсь и поэтсь Артур Моро лувондозе тя скульптурать пяк удалаф произведениякс. Сон няйсь эсонза мезьдовок аф пели, мазы од эрзявань портрет. Шамасонза лац няфтьфт эчкана трванза и инголи цють лисьф щёка пакаренза. Тя сембось, Моронь валонзон коряс, «няфнесы сонь кеме потмоёженц и лаказь лакай промозонц», конань авась аф лихнесы лангти, машты кирдема эсь потмосонза. Тяка пингть героинять образса ули авань ляпошивок. Эрзявать кувака шуваня суронза тиендьсазь сонь сядонга мазыкс, а нолдаф шяяренза китькснесазь мазышинц.

Эрьзя тяфтама аф оцю композицияса шарфтсь лама мяль анцяй пялькскятнень лангс. Кевронгть эса сон маштозь няфтезе сембе эрявиксть: авать щамсонза лац няевихть сёрматне, крганятне, а панарть мяштец пункстаф сюлгамса. Кучка сурсонза ули суркс, но стирсь рьвакс апак тук, тянь колга корхтай види лафту лангозонза лапотьф сёралоц. Рьвакс туф аватне кочкселезь шяярьснон пусмос и кяшенделезь панга или руця алу.

«Эрзянкась» тиф армировандаф бетонцта, хуш скульпторть лемоц кемоста сотф кебрачо и альгарробо омба мастсторса касы шуфттнень мархта. Эсь пингстонза сон покодсь мраморть мархтовок, но сизесь эздонза, маряк, мраморонь обрасне лисендихть аф сяшкава мялень салайхть. Эрьзя фалу ульсь бунтарькс, сяс эвондась мялец сяськомс казяма железобетонть, конань пяк ашезь кельге лия скульпторхне. Сон маштозь нолязе тевс тя материалть нльне авань образонь тиемстонга. Аньцек сяда тов синь «бетоннай» казямошисна стане жа мольфтезь мяленц.

А вов эрзявась железобетонца сембе ширде няеви лац. Мастерсь ашезе кельге эсь тевсонза вельф "ламбаськофнемать", а этническяй темати сон нежетькшнесь пяк и пяк серьёзна. Тяка пингть национальнай колоритсь тевонзон эса вестевок ашезь лихнев ёфси лангти. Сон пачфневи ваныти анцяй пялькснень, пластикать и марстонь потмоёжеть вельде. И скульпторсь вестевок ашезе путне национальнай идеять образонзон эсьлацоньшиснон коряс сяда вяри.

«Эрзянкась» салси мяль аф аньцек историческяй да этническяй ширетнень лангс ванозь. Васендакиге – тя авань образ — фкя сяка пингоня сон бта кочкаф лама аваста и бта няфни фкя и тяка ломань, конань авторсь сонць содазе и няендезе эсь сельмосонза. Образсь сембе ширде няфтьф пяк маштозь. Нльне тяфтама материалса, кода железобетонць, скульпторти удалась няфтемс героинять авань мазышинц и таколдоманц.